ខេត្តព្រៃវែង ៖ ព្រះសង្ឃចំនួនពីរអង្គនៅក្នុងវត្តព្រៃមូល នៅស្រុកមេសាងត្រូវបានកម្លាំងកងរាជអាវុធហត្ថខេត្តព្រៃវែងបានធ្វើការចាប់ឃាត់ខ្លួន និងដកហូតបានវត្ថុតាងថ្នាំញៀនចំនួន8កញ្ចប់ ព្រមទាំងឧបករណ៍សម្រាប់ប្រើប្រាស់ និងចែកចាយថ្នាំមួយចំនួនទៀតផង ។
ការចាប់ឃាត់ខ្លួនព្រះសង្ឃទាំងពីរអង្គនេះ បានធ្វើឡើងនៅវេលាម៉ោង12 និង50នាទីថ្ងៃត្រង់ថ្ងៃទី 13 ខែឧសភា នៅក្នុងទីអារាមវត្តព្រៃមូលស្ថិតនៅក្នុងឃុំទទឹង ស្រុកមេសាង ខេត្តព្រៃវែង នៅអំឡុងពេលចុះទៅបង្ក្រាបកម្លាំងសមត្ថកិច្ចបានប្រើប្រាស់វិធានញុះញង់ បញ្ឆោតឲ្យជនសង្ស័យបញ្ចេញវត្ថុតាង រួចក៏ចូលទៅបង្ក្រាបតែម្ដង ។
ព្រះសង្ឃទាំងពីរអង្គដែលត្រូវបានចាប់ឃាត់ខ្លួននោះគឺ ទី១-ព្រះនាម សូ សុខា ព្រះជន្ម៦០វស្សា ជាព្រះគ្រូចៅអធិការវត្តព្រៃមូល និងទី២-ព្រះនាម ធី ម៉ាប់ ព្រះជន្ម២៧វស្សា ជាគ្រូសូត្រស្ដាំ ទាំងពីរអង្គគង់ នៅក្នុងវត្តព្រៃមូល ចំណែកវត្ថុតាងដែលដកហូតបានរួមមាន៖ម្សៅក្រាមពណ៌សចំចំនួន៨កញ្ចប់ឧបករណ៍សម្រាប់ជក់ថ្នាំមួយចំនួន ទូរសព្ទដៃ 3 គ្រឿង ដែកកេះ 3គ្រឿង និងម៉ូតូមួយគ្រឿង។
សូមបញ្ជាក់ផងដែរថា វត្តព្រៃមូលនេះ មានព្រះសង្ឃតែពីរអង្គនេះទេ ក្រោយពេលត្រូវចាប់ឃាត់ខ្លួនសង្ឃទាំងពីរអង្គ នៅវត្តព្រៃមូលនេះពុំមានព្រះសង្ឃគង់នៅឡើយ ពេលនេះគណៈកម្មការសង្ឃ និងអាជ្ញាធរ កំពុងដោះស្រាយរកសង្ឃមកគង់បន្ត ដើម្បីឲ្យពុទ្ធបរិស័ទបានធ្វើបុណ្យ ។
ក្រោយពេលត្រូវចាប់ខ្លួន ព្រះសង្ឃទាំងពីរអង្គ ត្រូវបានចាប់ផ្សឹក រួចបញ្ជូនមកកាន់កងរាជអាវុធហត្ថខេត្តព្រៃវែង ដើម្បីកសាងសំណុំរឿងបញ្ជូនទៅកាន់តុលាការ ចាត់ការបន្តទៅតាមនីតិវិធី ៕